Mar 13 | KQF | STEP | Ḡome Yesu Maimaituwa ena vanuwa waiyawa i gosegose bi ena tauwaikaiwatana ḡemota i giuwena gado, “Tauwailovelove, kwa kita niga vanuwidi kitedi a visu gulata bi kota ḡakima nananakidi a laulaukeliyedina.”

a 13:14Deniel 9:27 noponemo ko kita.

c 13:24Aisaiya 13:10

d 13:25Aisaiya 34:4

e 13:26Deniel 7:13

Mark 13

Yesu i giu te muliḡa lava Maimaituwa ena vanuwa waiyawa sa ka gebogebo

(Metiu 24:1-2; Luk 21:5-6)

1 Ḡome Yesu Maimaituwa ena vanuwa waiyawa i gosegose bi ena tauwaikaiwatana ḡemota i giuwena gado, “Tauwailovelove, kwa kita niga vanuwidi kitedi a visu gulata bi kota ḡakima nananakidi a laulaukeliyedina.”

2 Yesu giu i waimunena gado, “Niga vanuwidi nananakidi ko kitekitedina, male mote kaka ḡakima ḡemota ena gabumo ima kena, matabudi kaka sa ḡima wai dabalali.”

Pilipili bi laukivigebogebo nopodimo Yesu ena tauwaikaiwatana sa moito didi

(Metiu 24:3-14; Luk 21:7-19)

3 Yesu oya Olip dabanemo i miya matana Maimaituwa ena vanuwa waiyawa yawaninaḡa i waikita nawa. Kamaina bi Pita, Diyemesi, Diyoni bi Endulu taudiḡa a tava Yesu lisinemo bi ai talayena gado, 4 “Kwa giuwemai, bai laḡannemo niga kauwidi sa tubuḡa? Bi bai matailina ka kita bi ka sibe te mba kauwidi ḡotona te sa tubuḡa?”

5 Bi Yesu i giuwedina gado, “Koi kita kauwa te mote aiyai ima kaiyovuḡemi. 6 Muliḡa male lava wapewapedi sa tava bi isagumo sa giuna gado, ‘Tagu taunana Maimaituwa ena vinevine’ bi lava wapewapedi sa'ai wai eta doliyedi. 7 Laḡannemo waiḡasiḡasi daguguna maidemo bi manekemo wasana ko vaiyena, ba koma naila. Niga kauwidi sa gei tubuḡa bi mba taunana mote damona. 8 Dam bi dam sai ḡasiḡasi, bi guyau palona guyau vaitena sai ḡasiḡasi. Bi dobu ḡesaudiḡa yoyo bi gomala sa tubuḡa. Niga kauwidi sa tubuḡana mai bena waivini bwagabwagana wainatuna yavina ya waitubuna.

9 Temi ko kita kauwa, lava male sa panimi bi sa etalemi, bi bolu vanuwidimo sa kwapumi. Banina temi tagu taukaiwatagu. Temi babada matedimo ko moito bi tagu giugu ko giuwedi. 10 Muliḡa kaka laḡan damona ya tava, dolina taukaiwatagu giugu visuvisuna sa lauguguyae dobu matabunemo.

11 Bi laḡannemo sa panimi bi sa nawemi ko etalena, mote komai nuwaboya dolidoli te bainewa ko giu. Mba laḡannemo bai Maimaituwa ya vitevitemina ko giuwe. Mba mote temi koma giugiu bi Aluwa Waiyawa noḡota ya vitemi te ko giu.

12 Lava ḡesaudi sa kaisolu te tasitasidi kedi ḡaviya nimedimo sa sivudi te sai pekidi. Bi tamatama natunatudi sa kaisoluḡedi. Bi libilibi sa kaisolu te tametamedi kedi ḡaviya nimedimo sa sivudi te sai pekidi. 13 Bi lava matabudi sa dabokemi, banina temi tagu ko wai sumaḡegu. Bi aiyai i moito didina te damonemo ba ya yawasana.

Wainuwatoi laḡanina dididiga

(Metiu 24:15-28; Luk 21:20-24)

14 Mba laḡaninemo kauwa gebogebo otina bi wai matawalawalana, ḡome mote maso i moito bi geḡa te ya moito.” Temi tau iyava niga ḡome bai ya giugiuwena banina ko sibe kauwe! “Tedi mabai Diudiyamo sa miyamiyana sa velau sa nawa oyamo.” ^a 15 Bi tedi mabai vanuwa dabanemo sa miyamiyana mote sima yovo vanuwa noponemo te edi ḡonaḡona bai vaina aubaina. 16 Bi kota tana aiyai daibimo mote i munaḡa vanuwemo ena gala vaina aubaina. 17 Bi mba laḡandimo vesavesala bwagebwagedi bi vaivaisudi lisidimo ba i gebo gulata! 18 Taunana aubaina kolau pali gulata te niga kauwidi mote bodubodumo sima tubuḡa! ^{▼▼13:18Glik baibol noponemo mote bodubodu ima kenakena bi gomala. (winter)} 19 Mba laḡanidimo ba wainuwatoi dididigina ya tubuḡa, mote mai wala pakanemo Maimaituwa dobu i voivoiyena laḡanemo te niganana. Bi muliḡa mote mai wainuwatoina ima tubuḡa munaḡa. 20 Bada ena vinevine lavedi kedinawamo aubaina te mba laḡandi i bwali wai watiḡedi, bamoda ḡega, mote maso aiyai i yawasana.

21 Mba laḡannemo bamoda aiyai ya giuna gado, ‘Kwa kita Vinevinena niga!’ ee ‘kwa kita tana nanoi,’ mote kumai sumaḡe. Banina Vinevinena kaikaiyovudi bi taugiuwatana kaikaiyovudi sa laumaḡata te mataila bi anisove kauwidi sa voiyedi bi bamoda ḡemoḡemotina te Maimaituwa ena vinevine lavedi sa'ai waietadoliyedi. 23 Taunana aubaina koi kita kauwa mwali matabuna kaikana e giu wainonomi.

Yesu ena yovo munaḡa.

(Metiu 24:29-31; Luk 21:25-28)

24 “Mba pilipilidi laḡanidi mulidimo

‘suwala yai dudubala bi nawalai mote ima yana. ^c
25 Bi kota kipola yadamo sa kuluva bi ḡaiḡailisidi sawasawamo matabudi sa gusu. ^d
26 Mba laḡannemo Tana Taunana Natuna yadamo, ya lauamagai ḡailisi vaitena bi ma namalina ya yovo te lava sa kita. ^e 27 Bi tana ena aneya ya giu kamaḡedi dobu matabuna sa kwaivivili. Bi ena vinevine lavedi dobu isuna bi isuna sai ḡemotidi, bi kota mainana galewemo.

Kaikini lautaulalana

(Metiu 24:32-35; Luk 21:29-33)

28 Niganana kaikini yai lovelovemi, laḡanemo kai lagalagana ya nimagala, ya kini bi lugudi sa gidagidava ba ko sibe te bodubodu laḡanina ya natonato. 29 Bi kota mainana temi niga kauwidi sa tubutubuḡa ba ko sibe te laḡani i watiḡe te tana ya nato munaḡa. 30 Giu kauwemo yea giugiuwemi, te niga kimtina sa miyamiyana mote sima peki bi niga kauwidi sa tubuḡa. 31 Galewa bi dobu salau neḡaneḡa bi giugu mote ima launeḡaneḡa.

Tada tavononoḡa Yesu ena nato munaḡa aubaina

(Metiu 24:36-44)

32 Bada ena nato munaḡa laḡanina bi suwelina mote aiyai i sibe. Mote aneya galewemo, mote natuna bi tamana taunaḡa i sibe.

33 Koi kita kauwa bi koi mayavai, banina temi mote ko sibe te bai laḡannemo mba laḡanna ya tava. 34 Mba mai bena oloto ena vanuwa i gose bi i nawa dobu ḡesaunemo bi ena taunoya ena vanuwa sa kita wata. Bi ḡemoḡemotaḡa edi noya i vitedi bi mataeta taulabena i giuwe te yai kita kauwa. 35 Koi kita kauwa bai aubaina, mote ko sibe te bai laḡannemo vanuwa taniwagina ya tava, bamoda aubigamo ee dudubala modonemo ee kamkam ya ḡabaḡaba ee olaolalemo suwala ya lovolovotava. 36 Mote koma kena komai nuwayavuḡa, bamoda yai nuwasilimi. 37 Bai yea giugiuwemina ba mainana lava ḡesaudi yea giugiuwedi: koi kita kauwa!”